Ar gyfer llety gwyliau hunanarlwyo rydym yn cyfrifo'r gwerth ardrethol yn seiliedig ar nifer y gofodau gwelyau sengl yn yr eiddo.

Y gwerth ardrethol yw ein hasesiad o'r rhent blynyddol y gellid ei gael am rentu eiddo busnes ar y dyddiad prisio. Ar gyfer eiddo fel siopau, swyddfeydd a warysau gallwn ddadansoddi rhenti blynyddol gwirioneddol i bennu gwerth ardrethol.

Ar gyfer lletyau gwyliau hunanarlwyo - fel bythynnod neu fflatiau gwyliau - nid oes tystiolaeth o renti ar gael fel arfer felly byddwn yn defnyddio pris fesul gofod gwely ar gyfer pob eiddo unigol, yn seiliedig ar y math, y maint a'r lleoliad, i bennu ei werth ardrethol.

Sut rydym yn pennu'r pris fesul gofod gwely?

Caiff y pris fesul gofod gwely ei gyfrifo drwy edrych ar lefelau proffidioldebystod o letyau gwyliau hunanarlwyo. Rydym yn edrych ar y cyfanswm incwm (heb gynnwys TAW) a gynhyrchwyd gan eiddo nodweddiadol ac yna yn didynnu'r costau cysylltiedig megis:

• Gwaith cynnal a chadw ar gyfer yr eiddo a'r ardd
• Trethi dŵr
• Trwyddedau teledu
• Dibrisio gosodiadau.

Nid yw ein cyfrifiad yn cynnwys cost unrhyw fenthyciad neu forgais a ddefnyddiwyd i brynu'r eiddo.

Pryd y caiff eiddo ei nodi fel llety gwyliau hunanarlwyo?

Os yw eich eiddo ar gael i'w rentu am 140 o ddiwrnodau neu fwy y flwyddyn, caiff ei nodi fel eiddo hunanarlwyo.